ድግም አቦትኩም ዳፍአት
ሐቴ ምሴት አቦትኩም ዳፍአት እት ቤተ እንዴ ትገሴት ዲብ ትድዔ። ውላድ ወልደ አሚረ ወሕሴን መጽአወ፣ ዲመ ሰበት
ትዳግም እግሎም ሰኒ ፈትወ፣ ምስለ እንዴ ኢልትሃጀኮ ኢልትመየው፣
እብ መጦረ እንዴ ትገሰው። ‘’አቦቶ ዳግሚ እግልነ። ዳግሚ እግልነ’’ ቤለወ፣ አቦትኩም ዳፍአት ‘’አነ ዮም ትዕበት
ሰበት ህሌኮ እግል እዳግም እግልኩም ይእቀድር” ቴለቶም፣ አሚረ ወሕሴን ሰኒ ደንገጸው፣ ‘‘አቦቶ ረቢ ልሽፌኪ። ወለ
ንኢሽ ዳግሚ እግልነ” ቤለወ፣ ህተ ላኪን ቅድረት ይዐለት እግለ። ምናተ ውላድ ወልደ እግል ተአደንግጽ ይሐዜት፣
እንዴ ተሐስብ ዐለት። ‘’ዮም እግል እዳግም እግልኩም ኢኮን። ላኪን ሰኣል እግል እትሰአለኩምቱ’’ ቶለቶም፣ አሚረ
ወሕሴን ‘’ደሐን ወለ ትሰአሊነ። ትሰአሊነ በስ’’ ቤለወ ሻፍጋም ዲብ እንቶም፣ አቦትኩም ዳፍአት አክል ሕድ እንዴ
አስተርሐት። ‘’ከአዜ ልብ ክረው ውላጄ ፈዳብያም። ለሰኣል ፈጅር በሊስ እንዴ ረከብኩም እግሉ ምጽኦ። ወእግል ውላድ
ግዋሬኩም አስኡሉ። ክሎም ለአጀኒት ፈጅር ዲብ እለ አካን ልምጽኡኒ ወለ በሊስ ለአስእሉኒ። ለበሊስ ለረክበ ድግም
አቦትኩም ዳፍአት ጃእዘት እግል ሀቡቱ” ቴለቶም፣ አሚረ ወሕሴን ፋርሓም ዲብ እንቶም ለሰኣል እግል ልስምዖ እዝን
ከረው፣
አቦትኩም ዳፋአት ክእነ ዲብ ትብል ትሰአለቶም። ‘’ገንሕ ወኢልርኤ ሚቱ።’’ ልብ ትከሩ እግልዬ ህሌኩም ማሚ? ገንሕ
ወኢልርኤ ሚ ክምሰልቱ አስእሉኒ ወአዜ ደሐን ትመየው’’ ቴለቶም፣ አሚረ ወሕሴን ቤቶም ገሰው፣ ምድር ክምሰል ጸብሐ
ውላድ ግዋሬሆም አስአለው፣ ለአጀኒት ክሎም ምስል ለሐስቦ ወልትሰአሎ ወዐለው፣ ዲበ ወቅት ለእግሉ ዋድየት እግሎም
ዐለት ክሎም ለአጀኒት ተለው ቤለው፣ አቦትኩም ዳፋአት ‘’ለሰኣል በሊስ ረከብኩም እግሉ ማሚ?’’ ቶለቶም፣ ሕሴን
እንዴ በድረ። ‘’አነ በሊስ ረከብኮ እግሉ፣ ገንሕ ወኢልርኤ ባምቡለት ቱ።’’ ቤለየ፣ ብራወ ወልዬ ፈዳብ ሰኒ
ጀረብከ። ላኪን ኢረክብካሁ፣ ‘’ብዕዳም ህዬ?’’ ሰኣል ደግመቶም፣ ሰለመት ለትትበሀል ወለት እንዴ ቀንጸት።
‘’ገንሕ ወኢልርኤ ዕዉር ላሊቱ’’ በልሰት እተ፣
አቦትኩም ዳፍአት ሰኒ ፈርሐት። ‘’ሰኒ ትበይ ወለቼ ኬር- ዋሌት። ምናተ ዕዉር ላሊ። እት
ጽልመት እት ኢኮን አምዕል ሰኒ ወአማን ልርኤ፣ ለበሊስ ኢረከብክዮ’’ ቴለ፣ ክሎም ለአጀኒት ዎሮት ከእብ እንክሩ
ጀረበ፣ እት ደንጎበ አሚረ ተአተንሴ እንዴ ዐለት ‘’አቦቶ። ገንሕ ወኢልርኤ አነ ኣምረቱ ህሌኮ” እት ትብል
በልሰት።’’ አቦትኩም ዳፍአት በሊስ አሚረ እግል ተአተንሴ እዝን ከሬት፣ አሚረ ለበሊስ ረክበቱ ሚ ኢኮን እንዴ
ትሸከክ። ‘’ገንሕ ወኢልርኤ ለኢቀርእ አዳም ቱ። አዳም ሐቆ ኢቀርእ። ውራቅ። አክትበት። ጀራይድ ወመጀላት ገንሑ
ላኪን ሚ ክምሰል ብዲቡ ኢልርእዩ’’ እት ትብል በልሰት፣ አቦትኩም ዳፍአት ‘’አብሽር ወለቼ ፋርሰት። ለበሊስ
ረክበቱ። አዳም ሐቆ ኢቀርእ ገንሕ ወኢልርኤ። ሰበት ኢልርኤ እብ ወረቀት ሕርዶሁ ገንድል። ለቀርእ ላኪን ክልኤ
ረአየት ልርኤ። ክመ ኢቀርእ ገንሕ ወዝያደት ብዕዳም ሕሩፍ ቀርእ። አዜ ለበሊስ ሰበት ረክበቱ ለጃኢዘት አሚረ
ናስአተ ህሌት’’ እንዴ ትቤ ክታብ ቅራአት ሀበተ፣ አሚረ መረ ፈርሐት፣ ለማ ብዕዳም እብ ፍድብ አሚረ ትፈከረው፣
ከፍቱያም አጀኒ። ምክር አቦትኩም ዳፍአት ሳምዓመ ህሌኩም፣ ለኢቀርኦ ሐውነ ወዋልዴነ ሐቆ ህለው ኖስነ ነአድርሶም፣
ቅራአት ኖርተ። ለቀርእ አምር ረክብ
ወምን ዕልም ልትረዘቅ፣
