ጀበነት እት ምጅተመዕነ
 

ቡን እብ ለተፈናተ አግቡይ ትትሰቴ፣ ሰሩ ዘንጀቢል እንዴ ወደ ዲበ፣ ሰሩ እብ ፈር-ፈር ወሰሩመ ሕበር ዘንጀቢል ወ ፈር-ፈር እንዴ ወደ ዲበ ሰትየ።ሰሩ እግል ህጅክ መሕበር ለአብዝሕ እተ ፈቴ ወሰሩ አምበል መሓውላይ በኑ ልትገንገአ፣ ከእብሊ ቡን እት አግቡይ ስታያመ ሰኒ ምን አድሐድ ትትፈንቴ። ኦሮት ነፈር ሰኒ ዋልፍ ክምቱ ለልትአመር ፍጃኑ እት ጂቡ እንዴ ወደዩ ገይስ እቡ፣ ቡን ናይ ብዝሓምመ ሳደፈቱ ምንገብእ እት መናሰባት ጀበነቱ በኑ ወድወ እሉ፣እሊ ህዬ ወለፍ ናይ ቡን ዐቢ እህትማም ሰበት ልትሀየብቱ፣ እት ብሩር አድሁይ ልብዘሕ ወልውሐድ ምስል ለሐድር፣ አስቡሕ አርድ ክምሰል ጸብሕ መዋግእ ቅብላት ሕድ ደጋድግ፣
ሱድፈት ሐቴ ቤት ምነ ድጌ ለዲብ ሕድ ካልል መውግእ ኢትሰመዐ እተ ምንገብእ ዮም እሊ ዐድ ሚ ጀሬት እሉ አፎ ምን ሞግእ አስቡሕ አጽበሐ? ልብሎ ለግዋረ፣ ላመ ዐድ አስክ ሚ ገብአው ልትበሀሎ ኢልታከው። ናቅሰት ለህሌት ምን ግዋራሆም ለአተሙመ፣ ቡን ምን አለቦም ዊደት።
መሪር ምን አለቦም እምራረት ወስከር ምን ኢረክቦ ክርየት ምን አድሐድ ረትዖ፣ እለ ርመቂት ናይ ቡን አመት አለበ ትሩብ ለዐለ ወለፍ ትከለሰ ምንገብእቱ እት ኢኮን ዋልፍ ዊደት ቡን ወ እምራረት ኢረምቅ ፣ ለዋልፍ ገበይ እንዴ አመመ ጋይስ ህለ ምንገብእ ፍጃኑ እት ሰለት እንዴ ኣተዩ እት ጂቡነከርዩ፣ ፍጃን ምን ሰለት አው ምን ጂብ ፈግር ተኣምርተ ወለፍቱ። ክል አምዕል ርምቅ ዊደት ላኪን ወለፍ ኢኮን፣ ከእንዴ እት ርምቅ ናይ ዊደት ቡን እት ዘበን ቅዱም ሓምድ ወድ ሸንገብ ለልትበሀል እናስ እግል ግዋሬሁ ለዐለው ክልኦት እናስ ስሪሬ ወድ ቴድሮስ ወ ሕምድ ወድ ሽርሹር ሰለስ ዮም ዊደት ናይ ቡን ክም ረምቀዉ ወሰልሲተን ለአምዔላት ሀበዮም ወሐር እብ ርምቅ ክም ኢነብሮ ወ ወለፍ ናይ ቡን ትሩድ ክምቱ እግል ለአስእሎም ሐዘ ከ ክእነ ቤለዮም፣- ጠልመተኒ ሼደሊ ጀረጥ ትቤ እብ ምሱል ሰብ ቀርብ ሰትወ ለዘርኦም ፋቲ ወ ግቡል ምን ሰለስ ብታክ ልዳለው አክለሞይ ወ ተውሊ ወ እርቡይ ቤት አስገዴ ትሰትየ ምን ጃንክየት ወዕሹር ሶተለ ተኣቴ ምልምልተ ምን በይእወ እብ ሕሽኩል ፋርህ ዲብክም ህሌኮ ሰሪሬ ወሕምድ ወድ ሽርሹር ቤለዮም።
እት ሙጅተመዕነ ቡን ሰኒ ፍቲትተ፣ እለ ምንገብአትቱ ክሉ ለእግሉ መልኮ ለለሀይቦ እተ። ቡን ንዋይ ልዘቤ እለ፣ ሰርጎ ልትካሬ እለ ወ መሳሪፍ ለሀይቦ ዲበ፣ ከእንዴ አዜመ ምነ ቀዳምያም ዐሊ ወድ ሃኪን ለልትበሀል እብ ምስምሰ እጋልዬ ክእነ ቴለተኒ እንዴ ቤለ እግል ወለፍ ቡን ክምሰል ኢትትዘቤ ለትሸርሕ ሕላየት።- ኢትስቴ ሼደሊ እግል አነ እትዘቤ ተአዘቤኒ እት ክሳር አዳም ነብረ ሚ ኢለሐዜ ወተአዘቤኒ እት ልባስ ሽልቱት እግል ትትመልሼ ተአዘቤኒ እት ጥልበት ዳቅብ ገሌ ሚ ኢወዴ ቡን ክሉ ሰተየ ፍጃን ዕቁር ወ ዊደት ጭቅምት ዲብ እዴ በዐል ዐጣል ሰተየ ዕንዱቅ እንቱ ለአመሴ እሲት ትትኬ ጀበነት ምን ኢተኬ ትትሰንጤ በዐል ሐ ሰተየ እት ትትጌለል ምን ተአቴ ትስከብ እለ እብ ማያ ምን ትትደመል ሚ ኢተሀሴጋሻይ ሰተየ እት አፍ መንገአት ልትገሴ ኢትህመሞ ድራርዬ ለቡን ምንዲ ኢተኬ ሹም ላተ ሰትየ እት ዐራታት ልትገሴ ወልእ ላተ ሰትየ እብ ሕንቃቄ ትትሰቴ ኢትስተየ ሼደሊ እግል አነ እትዘቤ ቴለኒ ቤለ፣