ገ ለ ድ

ሐቴ መደት ወነን ወነገል ዲብ ሰፈር ታለው፣ እት ገበዮም እት ልትሃጀኮ ገይሶ ሰበት ዐለው ዎሮከ ህጅክለ መልሀዩ ዐጅበቱ፣ ወእባሆም መሳኒት ገብአው፣ ክመ ተአሙሩ ወነን ዎሮ ምነ ቤልዐት ስገ ወሰኒ ሽዉክ ወትሩድ መትንዕያይ ቱ፣ ቱሉዩ ለሀለ ህዬ ምን ርሑ ወለ ሐቴ እግል ልክረዕ ለኢቀድር። ዲመ ለልትነዐዩ ወለበልዑ ሔዋንቱ፣ ምናተ እበ ህጅኩ ሰኒ ሰበት ፈተዩ ወትመሳነዩ ስገ መስኒሁ እግል ልብለዕ ኢትሸንሀ፣ ነገል ላኪን የአምነዩ ወየአግነዐ እግሉ፣ ክእነ ህዬ ቤለዩ።- “አነ ወእንተ እትለ ገበይ ቱሉያም ህሌነ፣ ሐቆ ታሌነ ህዬ ሕድ እግል ኢንጥለም ንምሐል” ቤለዩ፣

ወነን ህዬ። “ከእብ ሚ ንምሐል? አነ ላቱ ስገ መስኒዬ ሳርዑ ሰበት ህሌኮ ኢትፍረሀኒ።” ቤለዩ፣ ነገል እብ እንክሩ። “መልሀዩ ለጠልመ እኪት ለእለ ወዴ ዲብ ውላድ ውላዱ ልርከበ፣ እብለ ንምሐል። እንተ እለ በል ወአነ እብለ” ቤለዩ፣ “ከላስ መልሀዩ ለጠልመ ምኒነ ገለዱ ጠልመ ወገለዱ ለጠልመ ዲብ ውላድ ውላዱ ልርከበ፣ ዲብ ውላድ ውላዱ ልረአየ” ቤለው ወመሐለው፣ እብላሆም ህዬ ምስል እግል ልንበሮ ትዋፈቀው፣ ሐቆ እለ ክልኢቶም እት ደብር ዎሮ እንዴ ገብአው ነብሮ ዐለው፣ እተ ተሓትለ ደብር መሓዝ ዘረ ዐለ፣ ክልኢቶም እትሊ ደብሮም በልዖ ወእግል ሲቶ ለመሓዝ ወርዶ ዐለው፣ ውነን እተ ደብር ለረክበየ ዔቶት ከደን እት ልትነዔ ልትመወን እት ሀለ። ነገል ህዬ ምነ አስዕር ወለአቀጥፍ ናይለ ደብር በልዕ፣ ምን ብዕዳም መትንዕየት ህዬ ሐሰብ ወነን ጋብእ ወእብ ሰላም ነብር ዐለ፣ እብሊ ነገል ሰኒ ትረሸደ ወገረመ፣ ወነን ለሕዉዝ ወሓምል ገሮብ ነገል ዶል ረአ ሰኒ ትረቀበዩ፣ አርወሐቱ መትመላኩ ሰበት አቤት ህዮ ገለድ እግል ልጥለም ሐዘ፣

አምዕል ሐቴ ምዕጥን ክም ወርደው። ወነን። “ስምዐኒ ነገል እንተ እብ እንክር ተሐቼ እንዴ ገብአከ ስቴ” ቤለዩ፣ “መርሐበ እንተ ለቴልካሀ ክለ እወዴ” ቤለ ወምን ተሐት ሰተ፣ ወነን ምን ሐዲስ። “ዎ ነገል ሐምረግካሁ ዲብዬ ለማይ ሐምረግካሁ” እት ልብል ገጹ እንዴ አስረ ትወለበዩ፣ “ነገል እብ ልቡ ማይ ገጹ ተሐት ደንን እት ኢኮን ለዐል መለአቀብል። ወአነ ምን ተሐቱ ህሌኮ፣” እሊ ላታሓዚ ሰበብ ቱ ቤለ፣ “ከላስ ደሐንቱ አስክ እንተ ትሰቴ አነ እበጥር” ቤለ ነገል፣ እትሊ መሓዞም እንዴ ውዕላም ዐለው ምድር ክም መሰ ዲበ ደብሮም ዔረው፣ ወነን ዲበ ረአስለ ደብር ለትወቀለት እበነት ብልቶት እንዴ ገንሕ ዲበ ሰክብ እት ሀለ። ነገል ላኪን ወነን ለለዐርገ ሰበት ኢለዐርግ ሸበህ ምኑ ረዪም ዲብ አካን ጣፍሐት ልትመዬ ነብረ፣ ላሊ ሐቆ ትከፈለት ወነን “ዎ ነገል! ገለዱ ለጠልመ ሚ ልግበእ እምቤ?” ቤለዩ፣ “ትረስዐካሀ ማሚ አፎ እዬ ትሰአልከ ምነ።

 አነ ወእንተ ክልኢትነ እብ ኦሮ አፍ ኢመሐልነ? ዲብ ውላድ ውላዱ ትጽንሑ ሙሽ እምቤ” በልሰ ነገል፣ “ስምዐኒ ነገል። እሊ ገሮባይከ ሓምል እብለን ክልኤ ዕንቼ ዲብ እርኤ ከአፎ እዘም ምንከ? ሐሬ ህዬ ሑድመ የአተቅበልኮከ። አስክ እለ እምበሌከ አክል እሊ ዲብ ጀፈርዬ ምስልዬ እንዴ በልዕ ወሰቴ ለከልአ ሔዋን አለቡ፣ ከውላድ ውላጄ ህዬ ምን እግል ልርአዩ እግልዬቱ? አሆ አዜ እግልከ እንዴ ቀልጨምኮ ይእትደረር እግልዬ” ቤለ ወነን፣ነ ነገል በዲሩመ ሰር ልቡ ዲብ እንቱቱ ለምስል ወነን ነብር ዐለ፣ አዜ ህዬ ገለጄ እጠልም ህሌኮ እብ እዝኑ ዶል አስመዐዩ ልቡ እብ ፈርሀት ቀርበቱ እንዴ ሰጥረ እግል ልንፈር ሐዘ፣ ወነን ህዬ “እትሊ ደብር በይንነ አነ ወነገልቱ ለህሌነ፣ እሊ መስኪናይ ሔዋን እሊ ምን እዴዬ እግል ልፍገር ኢቀድር” ቤለ፣ ምነ አካኑ እንዴ ትዳለ እግለ ዲብ ምተሐቴሁ ለዐለ ነገል ክመ እግለ ብዕዳም ሔዋናት ለወድየ እበ ስጋዱ እንዴ ተሀልፈተዩ ስጋዱ እግል ልስበር ነወ፣ ሰኒ እንዴ ትከምከም ምን ረአስ እበነት ብት ዲብ ስጋድ ነገል ቤለ፣ ነገል ህዬ እበየ መጹ ክም ሀለ ኣምር ሰበት ዐለ። ዶል ለእለ ሰረ ዲቡተ ምነ አካኑ እብ ጀፈር ዎሮ ነጥረ ምኑ፣ ወነን እት ስጋድ ነገል ለሐስበየ ኖሱ እብ አምዒቱ ዲብ ክርሜደት ትከረ ወካልእ ኢቀንጸ ምነ፣ ካቲማሁ ዲበ ረአስለ ክርሜደቱ ገብአት፣ ከፍቱያም አጀኒት። ጣልም አማነት ኢሊዴነ ምኑ፣ አማነት ሰኒ ትርድት ተ፣ አማነት ለጠልም ህዬ እግል
ጸሩ ለሐስበየ ከያነት ተአክየ ረክብ፣ ርኤኩሙ ለወነን። አማነት እንዴ ኢጠልም እት ገለዱ እንዴ ሰብተ ምስል ነገል እብ ሰላም ምን ነብር የምክን ሞት ክፍእት ወኢሞተ፣ ሰበት እሊ ፍቱያም አጀኒት ገለድ ቅያስ አክል አዪ ትሩድ ክምቱ ነኣምር፣ ገለድ ዶል እንበይእ ህዬ ዲብ ገለድነ ንስበት፣ ክታብ አድጋም በዲር እግል ግም ሐዲስ።