ሕላይ ሰብ-በዲር  ......  ዔማት ክታብ ሐይለት ትግራይት
ዝያድ 700 ሕላየት እብ ለትፈናተው ሔልየት ምነ ትፈናተ ገባይሎታት እብ ሰበት ለትፈናተ ተጋቢብ ለተሐለ ህለ፣ ከእሊ ሐይለት እሊ ናይ ዮም ወማሌ እንዴ ኢገብእ ቀደም አምኣት ስኒን ለተሐለ ዝሕረት ትግራይት ቱ፣ ለትከተበት ኢትመይት ክምሰለ ልትበሀል ህዬ። ዲብ ሰነት 1913 ምን ትከተበ አስክ እለ ጸንሐ ወእሊቱ ነብር ሀለ፣ ሕላይ በዲር ሰኒ ጥዑም ወዲብ አፍካክ ለዘብጥ ነብረ፣ ሰበት እሊ እግል ሴምዓዩ ለረዬሕ ወብህላዩ ለልሐብን እት እንቱ አስክ እለ እንዴ ኢልትመሸግ ነብር ሀለ፣ ከአዜመ እለ ዝሕረት እለ እግል ኢልብዴ ወምን ጂል ዲብ ጂል እግል ልትትሐላለፍ'ቡ፡
 

መሐመድ ዐሊ ወድ ፋላት

 ምን ሐባብ ዐድ ህብቴስ። ከንቴባይ ጃውጅ ክምሰል ሞታ ለቤለየ ሕላየት 

ስም መሰመም - እግል አባይ ልትበሸል
እት ሔሳስ በርበሬቱ - እት አስርየት ኢልትከሀል
እት ወሓይዝ አብደላምቱ - ለመሓዝ ዐቢ ልጸቅለል
አድ-ሕድ በጽሕ ኣብ ሃክብ - ለከረም ምንዲ ትትሀንደር
እት አራዊት ኮከባይቱ - ኢለአትፋኔ ልትአዘር
ጽፍሩ ጸብጥ ወአርግሁ - አቡሱሰ ለወነን
ኢሀይቦ ቅታሉ - ኢሐድጎ እብ ደልደል
ግሎት በሌዕ እበኑ - ዐቅበ ናቅል ወሕመር
ከአዜ ሰኒ ወለድከ - ምንመ ትመይት ትትቀበር
እት ፈረዕ በደ ኢተሐስብ - ጋንከ ልስከብ ኢልስሀር
አባይኩም እበዎ - ለተአመስሎ በዐል አከር
ፈታይኩም ፍተዎ - ለእት ገሮብኩም ልትአመን
ማርሓይ ሰኒ አምርሑዎ - ሰኒ ሊበል ወልግበር
ታይላይ ሰኒ አትልዎ - ደረብኩም እግል ኢልደልደል
ትግራይ ሰኒ አምብሮ - ዲብኩም እግል ልትከተል
ኢትዝበጦ እብ ሞራ - ወኢተዐይሮ እብ ከንፈር
መቅስናይ መርባት ብጎነ - ለላሊ ተርህ ዲብ አከር
አዜመ ስልጣን ብጎነ - ለሹም ግሱይ ረአስ መንበር
አዜመ ጸጋይ ብጎነ - ለጋሾታቱ ልደረር
ለደፈአነ ብጎነ - ገድም ዲብ መን ንሰፍለል፣

እያይ ወድ አግዱባይ

ለልትበሀል ሓልያይ ምን መንሰዕ ቤት አብረሄ። እት ሐብስ ጢላን ዲብ እንቱ ወምነ ሐብስ እግል ለአድግሩ ልስእዩ ለዐለ ተስፋንኪኤል ወድ አፍታይ እንዴ ኢለአፍግሮ ምን ሞታ። እያይ እብ ሞት ተስንኪኤል ግሂ ወእሱፍ ዲብ እንቱ እግለ ፋርስ መለሀዩ እብ ክእነ ሸንበረዩ።-

ዮም ወህር ሞተ - ተርፋ ምንለ እማቱ
ዮም ጸጋይ ሞተ - ዘረ ህያባቱ
ዮም ሓጥር ሞተ - ዶልለ አትማካቱ
ዮም ሐየት ሞተ - ገንድል እብ ተውያቱ
ዮም ሐርማዝ ሞተ - ድሜ እብ ዐውለቱ
ዮም ወልእ ሞተ - በኪት አድናሳቱ
ወዮም ስልጣን ሞተ - ትርካይ እብ ርሻሹ፣
ዮም ደብር ወድቀ - ትከረ እት ሳሳቱ
ለመርከብ ትፈናጠሻ - ድጌ ምን አፍያቱ
ግርግር ጼደደዩ - ከአብሑር ደነ ባኩ
ቀነብር ደሀብ ሳቅል - ቀሰብ ዋንጨታቱ
ገሌ ጨብላይ ሰቴ - ወገሌ አምያሳቱ
ገሌ ስጋ በሌዕ - ቀንጽ ዲብ ሕራዱ
ወገሌ እክል በሌዕ - ገሺሽ እብ ሔሳሱ፣
 

ዐሊ ወድ ፋይድ ለልትበሀል ሔልያይ እብ ክሱስ መርባት። ሕሜት ወድመል ለሐለያ ሕላየት እግል ንርኤቱ።

ከአሰልፍ እብ ሰበት መርባት እግል ነአምብት።-
እለ ስልባት እብጣር - ምን ከብጄ ኢትበዴ
ኢተንሰአኒ መንባዬ - ሐክር እንዴይ እወዴ
እግል አሉለ ከሀልናሃ - ዳቅብ ዘምት ወለአቴ
ዐቀይታይ ኢኮን መንባዬ - ሐረስታይ ለማሼል ለኣቴ
ወእግልሚ ትበዴ መርባቼ - ክሪት ህሌት እት እዴ፣
እብ ሰበት ሕሜት ህዬ።-
ነሐሜከ ህሌነ - ንጉስመ ሕሜት ሚ ኢልክህል
ዲብ ነፍስነ ነሐሜከ - ሐሊብ ስጋ ወእክል
እት መቅጠንነ ነሐሜከ - ብላይ እግል ንተልትል
እት እንሱስነ ነሐሜከ - ንዋይ እግል ንጸግር
ወእት ጽዋርነ ነሐሜከ - አቡ ጢዝ ወግንጽል፣
እብ ሰበት ድመልማ ክእና ቤላ።-
ሕነ እግል ድመል - ሴመ ኢወዴና
ንዋይ ኢዘመትነ - ከእቡ ይአቴና
ግሰስ ኢጋረብነ - ወሕረም ይአትባኬና
ማይት ወአቅሰነ - ኖስነ ወደርኬና
ነፍስ ኖሼ ትቤ - ከአቤት ዲበ ጼና
አዜ ዲብ ምን ንእቴ - ሐቴ ክም ወዴና
እብ ዲደትነ ንስከብ - ክም ሴመ ኢትዋዴና፣
 

“ ዝላም ሀረት ዲቡ” ለትብል ሕላየት ዐሊ ወድ ሕመድዳር ምን ክልኤ ማርየ እግል ነአምብት። ከእስትንቡረት ኬር።-

ዝላም ሀረት ዲቡ
ዝላም ሀረት ዲቡ - ድግድግ ለእት እሮተ
ሽምብሬበት ጀደዕ - ሕጃብ እት ክልኦተ
ቅዲት ነሳንሳሃ - እመ ወአቦተ
ልብስ ደረድራሀ - አስክ ክልኤ ምሖተ
ገድከ ምስለ ትሰክብ - ብእሰ እንዴ ሞተ፣
ዝላም ሀረት ዲቡ - ቁሽ ወተምበቄ
ለሞጅ ዐድ ሕድ ዛብጥ - ለአልመ ልዘራኬ
ፈግር ምነ ሚቡ - ለበሐር እብ ሕማሴ
እምበል ቀዋሴናይ - ለእትከብደ ዋሴ፣
ዝላም ሀረት ዲቡ - ግዕር ጎርለ ጋድም
ሐማስ መትበዴሪ - ምንረሐር መትከማክም
እግሩ ሸተት ትወዴ - ወአፍሁ ገረት ላክም
ሕነ ዲብ ረአሱ - ነሐሌ ወእንዳግም
ዝላም ሀረት ዲቡ - ወድ ሀበሮ
ፋቲ ተቀም ቤለ - ክም ተቀሮ
ገሌ ገዐዞ ቤለ - ወገሌ ሕደሮ
ዝላም ሀረት ድቡ - ሰለስ ለትሉሉይ
ደንገል ወመንታይት - ወለጋድም ጉሉይ
ድማን እገር ሰሐቶ - እብ መልሐተይ ኩሩይ
ዝላም ሀረት ዲቡ - ጽሬሕ ወዐጋመ
ሚዶል ትፈናቴነ - አነ ወዝላመ
ሼቲት እስእን ሐዳስ - ጭብዕት እብ ዕላ’መ
ሐይረት ሻነቀዩ - ለአክማመ፣
ዝላም ሀረት ዲበ እምበሀረ
ከቦ ወድ ሾክናይ - ኢትጸበሐ ወኢትደረረ
ገዱ ምስለ ቤተ - ወምስለ ዐለ
ሕሜተ እንደይ - ፈረሀ ወመረረ፣
ዝላም ህረት ዲበ - እት ፍልዔተት
እትሐለመ ብትኮ - ክምሰል ጎዬ ቤተት
ቀለስ ምን ፈዝዐኮ - ከንዶእ ለእለ ጌሰት፣
ዝላም ህረት ዲቡ አሪበሮ
ሰለስ ረሶብ ረኤነ - እት ልትከሐዶ
ወሮ ድማን ቤለ - ወቄደዶ
ዎሮ ገለብ ቤለ - ሰምሀር ረዶ
ዎሮ ንሕጌ ቤለ - እምበል ረዶ፣
ዝላም ህረት ዲቡ አባረረ
ከንቴባይ ሰብከ ዲቡ - ወዐሊ-በረ
ቡራዶ አበ’ ዲቡ - ወአሳደረ
መቅረይ ዔረ ዲቡ - ወትከበረ፣
 

ስልማን ወድ መስመር ምን ዐድ-ትማርያም እግል ህዳድ ወድ ረከ እት ለሐምድ ለቤለ ሕላየት ክእና ትብል።-

ዐንሰበ ለሐርማዙ - መሓዛት ገብአ ግንዳዩ
ዐንሰበ ቀይም - መትሉቅ አበ ዐዳዩ
እሊ ጋድር ጋሬሕ - ዶልለ መትገንባዩ
እሊ ሐየት ባሌዕ - ግሱይ ረአስለ ቅታሉ
ገይዳት አትናጻሉ - ወዐጽም አትማጻዩ
ጽርሑ ወለብላቡ - መውዒሁ ወዕዋዩ፣
አብር ልሔታ - ዶ’ለ አውሻዩ
እት ሐረምዝ ዕኬሪ - ምዕጥን አበ አርዋዩ
እት ሐዮታት ሀንዳሲ - ለጋድ አምር ምብኣዩ
እት ሀመሚት ሽሎጊ - ስጋ ህቱቱ ባልዓዩ
ወእት ሀዳይድ መረዝም - ሞዳይ አበ አጽሃዩ፣
እለ መራነት - ጭገርከ እበ ልትፈተል
እት ጋድም ልትከሬ - ለጎምየ እንዴ ልትወገር
ሐዳር ጋሾታት - እንዴ ክቡድ ልትሐደር
ሐዳር ከራዊ - መትሉቅ ልትወዔ ወልትገዐር፣
አርዌ ላሊ - ከብድ ሰዐር
እዴሁ ኩከት - አፍሁ መዐር
አፍሁ ጸቢብ - ከብዱ በሐር
ጽኑዕ ሞላዱ - አስማም በሌዕ ወዐንደል
ወጽኑዕ ስጋዱ - ምን ዋልዩ እብ መንደል
እግልከ እምብል ህሌነ - ክቡድ ጽዋሩ ወጀደል
እት በርዐረብ ሰሙከ - እት ሳሊመ ወገንደር፣

ስልማን ወድ መስመር ምን ዐድ ትማርያም ብዙሕ ሐይለት ምንማ ሓሊቱ እግል ዮም እለ እብ ሰበት ድመል ሓሁ ምን ትዘመተት ለቤለ ሕላየት እግል ንርኤ።-

እሊ ሕጻጽ ወዐራዶ - በዲር በዴ እብ ክል ቤት
ምድር ራየት ወሖጺት - ብሮካታት ወከድ ቤት
ምን ሰቡከ እት ሕጻጽ - ዕዳይ ክቡድ ወፈዴት
ወለ ደሀረ ምን ወቅልቱ - ወክለ ስሙ ለትከሬት
ሖይት ብእተ ከብጄ - ኢደለዋ ወኢደሌት
ኢትመይት ወኢተሐዬ - ከብድ ሐቆ ኢነጌት
አደብ ሳልስ በቃሪቱ - ኢመጸአከ እብ ትምኔት
እንራብ ሳሜዕ ህሌኮ - ማሌ ምሴት እብ ሕሜት
ሻምመ ልምጸእ እብ ፈኑ - ቀልብመ ልምጸእ እብ ስኔት፣
ትንፍየ ወዐገበ - ዳግሬ ወመሓዝ ሺሸሩ
እት ከብደ ወዴቱ - ግርግር ማዩ ወሰዐሩ
ነዳልለ ህሌነ - እንዴ ገአት ገለሉ
ፈንጎሕ ለሕጻጽ ሳምያተን - ክል ቤት ልፍገር አከሩ
ሳሕል ወድ ባጅል ከልአዩ - ሰዋክንያይ እበ ገመሉ
አቡከ ሐየት ተብዐት ቱ - ገጹ ዝውይ ወአሰሩ
ለብከ ናሽሕ ከልአዩ - ከበዝሐ ዲብነ መረሩ፣
ዓመት እኪትቱ አቡከ - ሕራድ ኢኮን ወተረብ
ኣውለት አውልቱ አቡከ - ሮረት ባልሰት አመቅረብ
ብክር ሐጋይቱ አቡከ - መስረጥ ጋብአት እብ መሕለብ
ለምን ሰብ ትገይ ኢነአቤ - ወምን መቅጠንነ
ትትገረብ፣

 

እድሪስ ወድ ገብሸ

ለልትበሀል ሓልያይ ምን መንሰዕ ቤት ሸሕቀን ፈታዩ ወመስኒሁ ለዐለ ከንቴባይ መሐመድ ክምሰል ዖረ። እብ ዐወር ናይለ ፈታዩ ግሂ ዲብ እንቱ። ለናይ በዲሮም እንዴ ትሰፋለለ ወትሰራበበ። እግል ከንቴባይ መሐመድ ለሐለየ ሕላየት

መርሐበ ወከንቴባይ - ሹም ለሓክም እንታቱ
ልግበአኒ ኢልብል - በዲርመ እሊ ፍራዱ
እበ በዝሕ እንሱሱ - ወእበ ፈሬ ለሕራሱ
እበ በዝሕ እንሱሱ - ወእበ ሰልሕ ወላዱ
እሊ ዐድ ሐቆከ - ገዐዞ ልብል ወዋዱ
ምን አምረ ገበዩ - ወምን አምራ ጎማቱ
እሊ ዐድ ምርዝሙቱ - ወእሊ ዐድ ታክያቱ
መርሐበ ወድራር ጋሻይ - ናጽፎ ልብል ወዓዱ
ለገሌ አስጋይ ልትደረር- ለዋካት እንዴ ገራዙ
ለገሌ በልዕ ገሻይሽ - ለገሌ ሰቴ አምያሱ
ለገሌ ተኬ ቀሐዋታት - ደጋዱጋ ለአትማሱ
ሐቆ እለ ልትወለብ - ከከፍክፍ ዝሕረት አብያቱ
ምን አምበል ከንቴባይ - ለእግል ጋሻይ ሕራቡ
አመቱ ሃብ ሳውያ - ለምድር አስክ ጽብሓቱ
ረበዕ ለረብዓት ልዳገን - ለምኑ ነድእ ጎምሳቱ
ረበዕ ሰባር መጋዝም - ምን ነውንዩ ስጋዱ
አንጃቡ ሐራጽጽ - ገይዳት ጥራይቱ ልማዱ
ረበዕ ቶር ለዐገበ - መስከቡ ሎሀይ በርካቱ
ረበዕ ሐራይሽ - ኦሮ ቀርኑ ከልሻቱ
ረበዕ ሐረምዝ - ለሀንጠዋጥል ነግዋቱ
ረበዕ ሰብ ተብዕን - ፍጫል ቃቀት እንታቱ
ሸሩ ልብሎ ልክለአነ - ምን ግንሐትለ አብዛዙ፣
ዔማት ክታብ ሐይለት ትግራይት 1913
 

  ስልጣን ወድ ሓምድ

ለልትበሀል እናስ ዐድ ትማርያም። ጸሩ ወሕዋሌሁ ለዐለው ሰብ እንዴ ከየነው ዲቡ ቡን ቀደሜሁ ምን ሰተው ለሐለየ ሕላየት ገሌ ምን አብያተ ንርኤ።

ሐመድኮከ ኢላሂ- ወሀ ጀላጀላሉ
ገሌ ጽጉብ ትወድዩ - እብ አርዛቁ ወማሉ
ወገሌ ድቡር ትወድዩ - ፈሊላይ ጸዐደ አጭፋሩ
ገሌመ ፈዳብ ትወድዩ - እት ከባክብ ኣጋሩ
ገሌ ሐዋን ትወድዩ - ንሱእ ምኑ ድራሩ
ወገሌ ማይት ትወድዩ - አከፍንቱ ለአዳሉ፣
ገሌ ሐይ ትወድዩ - ገናዳሉ ወበሃሉ
አምዕል መነ ሞላዬ - ምነ ኖርለ አንዋሩ
ወላሊ መነ ሞላዬ - ዕንታት እግል ዓዋሩ
ወጀነት ምነ ሞላዬ - ምነ ስርለ አስራሩ
ወእሳት መነ ሞላዬ - እግ’ለ ኡኩይ ዓማሉ
ረቢ ኖሱ ለአምረነ - ወአዳም በዐ’ለ ኤማኑ፣
ሕናመ ረቢ ቱ ለሀይበነ - ሙሉእ ሀለ አክዛኑ
ለዲብ ፈትዩ አቤከ - እንታመ ትወዴ አካኑ
ለእት ተሀይቡ ከልአከ - ክል ኦሮ ልውዕል እብ ማሉ
ምንዲ ነሀርሰከ ፍዘዕ - ወክቡድ ቅሳኑ
ስካብ ላሊ ከልኤነ - ዐገምበስተ ጀርጃሩ
አነ ፋዜዕ ትመዬኮ - ወአዳም ብዕድ ኢፋሉ
አበረ አቡከ - ጌሰ እበ ደናኑ
ቀትለዉ አቡከ - ክሉ ሰዐዩ ጥርዓኑ
ሸቃለ ቀትለቱ - አዳ’መ ምነ ሐዋኑ፣

ምን ክልኤ ማርየ ላቱ ሽኩራይ ለልትበሀል እናስ። ጋሻይ ዲብ እንቱ ዲብ ኦሮ ዐድ ክም ዔረ ወለዐድ ምን አቤተዉ ለሐለየ ሕላየት ንግነሕ፣

ሊሊት ስፍሩይ ትመዬኮ - እትለ ከሌብ ዐድ ዕብድል
ሸረ እግል ልክለአኒ - መንደርዲ ጋሻይ ኢወግር
ቀደም ሰላም ልብሎ - ከልትሓበቦ እብ ተስትህል
ወሐር ነብረቲት ሀይቦ - ለእለ በሌዕ ወመጭር፣
ሊሊት ስፍሩይ ትመዬኮ - እትለከሌብ ኢሀርቦታት
ሰብ-ለሰብ ሐምዴኖስ - ኤለአድሮ ጋሾታት
እክሎም ባቅል ቱ ቤሉነ - ዐጌብ እትለጋድሞታት
እብ ሕድት ወሐመድኮ - ምን ሀይቡኒ ጪፎታት
አቴኮኩም እት ዐርብ - አናቱ ከለል ጋሾታት፣
ሊሊት ስፍሩይ ትመዬኮ - እትለከሌብ ኢሀርብ
ዐቢ ላቱ ኢጸንሐ - ወንኡሽ ጋሻይ ኢሐርብ
ሊሊት ስፍሩይ ትመዬኮ - ከልባይ እትለከሌቡ
አተመመዩ ኢኮኒ - ዕድም ዐለ ነዌ ቡ
አከለቱ ትደረራ - ምነ መልአ ወሬቡ
ሊሊት ስፍሩይ ተምዬኮ - እትለ ከሌብ ዐድ ፋይድ
ክልሞላዱ ለአደሜዕ - ዐሊ እብ ማርዳይት
ኢነሐሜ ወኢነሐምድ - ስሜት ሚቡ ገናይዝ
ሊሊት ስፍሩይ ትመዬኮ - እትለ ከሌብ ዐድ ድዌድ
እት ረአሼ ትደረረው - እት ለአምሩኒ ምን ቅዌት
አነ ሌጠ ኢኮኒ - ክሉ ቀትሎ እብ ንዌት
ሊሊት ስፍሩይ ተምዬኮ - እትለ ከሌብ ዐድ ገሊድ
እብ ሰፍሬኮ ሚ እጠቤ - ኢሐድጋ ተኣመሪት
ላሊ ዐጣል ኢኣኬ - ክምሰል ዕዮት ወነዊድ
ሊሊት ስፍሩይ ትመዬኮ - እትለ ከሌብ ዐድ ሀሩር
ዓመት ከአፎ ፈግረ - ህርብ ላቱ ወድቡር
ሊሊት ስፍሩይ ትመዬኮ - እትለ ከሌብ ሐጹረ
ክለ ጸንዐት እዲነ - ኢትበሉሰ እት ዱረ
ወክለ ሐጥዐት እዲነ - መአማን አበ ድቡረ
ሊሊት ስፍሩይ ተምዬኮ - እትለ ከሌብ ህምብያይ
ወሐስድ ወረግም - አዚም ሚቡ ወድ እያይ
ሊሊት ስፍሩይ ተመዬኮ - እትለ ከሌብ ዳመሪብ
ጋሻይ አብህብቴስ - ወእክል ልብል ወሐሊብ
ሊሊት ስፍሩይ ትመዬኮ - እትለ ከሌብ ወድ ዐቅባይ
በዐል መራነት ቱ አብፋጥነ - በዲር ወዕልቱ ዲብ ዐባይ
እክል ሀይብ ምን ቤቱ - ወሐሊብ ሀይብ ምን ንዋይ
ሊሊት ስፍሩት ተምዬኮ - እትለ ከሌብ ዐብደለ
በዐል ሐልፋቱ አብ መከ - ወክለ ሀይብ ወሰረ
ሊሊት ስፍሩይ ትመዬኮ - እትለ ከሌብ ወድ ዕብድል
እነስእቱ አዜመ - መስከብ ምንዲ እበድል
ምን ዐድ ቅልጭ እትጸበሕ - ወበንበን ልጽነሖ ወምስል
ምን ሻባይ እትጸበሕ - ወእደሀር እቱ ወእወቅል
ምን እም ሕጀት እትጸበሕ - እግልዬ ትረክብ ምን ተሐግል፣
 

   ግዱፍ ለልትበሀል ሔልያይ ምን ሐባብ ዐድ ህብቴስ። እሲቱ ምን ሐድጋ። ሕመድ ለልትበሀል መስኒሁ ህዬ ለሕድጎ ምን ኢረደዩ እሉ። እት እሲቱ እግል ለአቅብል ደከለዩ፣ ግዱፍ ህዬ እግለ ደኪለት መስኒሁ ሕመድ እብ ክእና በልሰ እታ።-

እንዴ ድዌ ወሕመድ - ለደኪለቼ ምን ተሐዜ
ሐርማዝ እንዴ ዳበራ - እብ ሓልቦትት ምን አቴ
እርወት እንዴ ትገበለት - እት አሓ ነጹፍ ምን ትትገርጄ
ሐየት በዐል አሓ ምንገብእ - ከመሐልከ ወዕቆት ምን
ወዴ
ህመም ዐጣል ምን ለውዕል - ወለትጸረረት ምን ጠቤ
ሀሮዳ ለዐል እንዶ ደርገጋ - ከእት ስጋደት ምን ተኬ
ወሒዝ እንዶ አቅበለ - ከእት ርወሪት ምን አቴ
ወዐስተር ጋድም ምን ትገብእ - ከአድሁይ እለ ምን አቴ
ወ ጋድም ዐስተር ምን ገብእ - ከዐረዴና ምን ተኬ
ወበይሖት እትዬ ምንገብእ - ከመድህን እታ ምን አቴ
ወድ ሐሺል እንዶ ትሸየመ - ከእብ ዋንጫታት ምን
ሰቴ
አንጻይ አመት ምንገብእ - ከከልዔተታ ምን ተኬ
ከራይ አዱግ ምን ተውዕል - ከሸእ ትብል ወትከርሴ
ወገርዋ ብዕራይ ምንገብእ - ከበዐልቱ ቀሐተ ምን ትወዴ
እለ ኢገብአት ምንገብእ - ሑካዲ ለቤታ ኢአተ፣
 

መደት ሐቴ ኦሮ እናስ ፋርስ ሀርመች ሓሁ እግል ልዝመቶ መጽአዉ ወአትፋርሀዉ፣ ሰበብ ለእቡ አትፋርሀዉ ህዬ። ቀደሜሁማ ፍራስ ብዝሓም ቃትሎ ወንዋዮም ዘምቶ ምኖም ዐለው፣ ህቱመ እንዴ ኢፈርህ ምኖም ወለፍራስ እንዴ ልትዘከር ክእና ቤለ ከሐለ

ይእሰኬ አቤኮ
ይእሰኬ አቤኮ - ወይአትዋይን መስእላይ
አቡዬ ወድ ገልሀን ቱ - ወእምዬ ወለት ዐድ ሐዋይ
መስከብና አይባባ ቱ - ልትሻበቡ ክል አባይ፣
እብ ከፈንዬ ተሉኒ - ምዕቅር ቅዲት ወብላይ
ከረ ሐመድኑር ሽንጌራ - ውቱድ ክም ሕመራይ
ወክም ናይብ መሐመድ ሐጪር - በአስ ለአምር ወሕላይ፣
ወዓፋ ወድ ሙሳ - ለሕጻን አልመዳይ
ወድ ሼክ ወድ ዕጄል - ክም ህርብ ለአፍለንዳይ
ለውላድ ዐድ ሹማ - ለዕንቶም ፋግረት ምን ዕራይ
ቤት መዕላ ትዘከርኮ - ታሪክ ለአምሮ ወሕላይ፣
ይእሰኬ አቤኮ - ወይአትዋይን መስእላይ
መስከብዬ እሙር ቱ - ልትሻበቡ ክል አባይ
ለህሌት ኖስኩም ትርእዋ - አዳም ኢትቀትሎ ወንዋይ፣
ሕዱግ ስሌማን እድሪስ