ሽንገላት

እት ሙጅተመዕነ ለትፈናተ ዓዳት ወለመድ ሀለ፣ ገሌ ዓዳት ወለመድ እት ሐቴ ቆምየትመ ምን ገብእ እት ገሌሁ ለገባይል ክም ዓዳት ናይለ ሙጅተመዕ እንዴ ነስአዩ ልትነፈዕ እቡ ወገሌ ክሉ ረአሱ ኢለአምሩ፣ እሊ ህዬ ምስል ፈያሐት ምድር ወ ብዝሔ ናይለ ዓዳት እግል ልግበእ ቀድር፣አምበል እሊመ ሰሩ ዓዳት ምን ብዲር ለጸንሐ ወአስክ እለ ለአተላሌ ለሀለ እት ገብእ። ገሌ ላተ እብ ድግም ሌጠ ለልትሰመዕመ ኢልትሐገል፣እግል መሰል እለ ሽንገላት ለትትበሀል ሐቴ ምና እት ገባይል ትግሬ ለትገብእ ምንማተ። እት ገሌሁ አካናት የምክን ትትአመር ኢትገብእ፣ ዓመተን ሽንገላት እት ክልኤ እግል ንክፈለ እንቀድር፣ ለአወላይ እሲት ምን ቤት ሕርስ ዶል ትፈግር እግል ጅነ ንኡሻይ ወድ 40 አምዕል ለትገብእ ተ፣

ለካልኣይት ህዬ ነፈር ስነት ሰብ ዶል በጽሕ ከአክልሕድ ዶል ተምም እግል በጽሕ ለትገብእ ተ፣ አምበል እሊመ ሽንገላት አምበል እት ቆምየት ትግሬ። እት ቆምየት ብሌንመ እምርት ዓደት ተ፣ ከዮም ሽንገላት ለከስስ መውድዕ እግል ንትናወልቱ፣ አወልዋል ሐራስ ምን ትወልድ አስክ ተአወልውል እትለ ቤተ ድቡድብት ትጸንሕ፣ ከድን ኢትፈግር ወእት አፍያት ኢተአንጎጌ፣ ላመ ቤተ ሸማላት ወበርሀት እግል ኢልእተው እተ ሽሙይ ደባዱበ ወአክረት ወዱ እተ፣ አርበዐ (40) አምዕል ዶል ተአተምም ሀዬ ዮም እግል ተአወልውል ቱ ልትበሀል፣ ሰልፍ ምነ ቤተ በረ እት አፌት እብ አበሊት አክረት ወድየ እግለ፣ እትሊ ክራር እሊ እሳት እራይ ለአቀርሐ፣ እሳት ከም ቀርሐት፣ ለጅነ አቦቱ አው እም ሞልዱ ትረፍዑ ከ ለእሳት ትትዓዴ እቡ፣ እብለ ሰቦዕn ዶል ለእሳት ልትዓደየ፣ ሐቆ እለ ለሐራስ እብ ጀናሀ ቤተ ትአቴ፣ ጀናሀ ተአጠቤ። ተነት ትስሕን። ትትገደል። ትትናደፍ ወልባሰ ልትሐጸብ እግለ፣

ህተ እሊ እንዴ ትወዴ እት አፌት ታኩ አውመ ፍሬ ተኩ፣ እሊ ፍሬ ክም በሽለ አጀኒት ልትላከየእቱ፣ ለአጀኒት ረአሰ እሳት ለፍሬ ትኩይ እተ ለዐለ እደዮም ጸብጦ፣እለ ዶል እለ እማት። ሐሊብ ማይ እንዴ አብዘሐየ እቱ እት እደይለ አጀኒት ለረአሰ እሳት ዋድያሙ ሀለው በልሳሁ፣ ለእሳት እብሊ ሐሊብ ዲብ ቀስን ለአጀኒት። “ ንኡሽ ልዕቤ ወእሳት ትቅሰን። ንኡሽ ልዕቤ ወእሳት ትቅሰን፣፣” ልብሎ፣ እሳት ከም ቀስነት ምነ ፍሬ ሽለጎም መልአ እግሎም ከጪፎቶም እንዴ ነስአው። ፍላናይ ተልሄነ ምንከ ተልሄ። ሽንገላት ተልሄነ ምንከ ተልሄ። ነዐ። ነዐ እግል ንተልሄ ልብሎ እበ ስሜት ለእግለ ስሙይ ሀለ እንዴ ልትላከዉ ገይሶ፣፣

ሽንገላት ለጀነ እሙ ከም አወልወለት። ግድም ሸንገለ ልብሎ። ከእግል ትምኔት ሰኔት ጪፎት ጬፍየ ወቅሎ ቅልየ እግሉ፣ ነፈር እንዴ መጸ ህዬ ጭገሩ ላጼ እግሉ፣ እሊ ለላጸዩ ነፈር ነገለት ለሀይቡ፣ ወለት ፍላነት ሀብኮከ ልብል ወልድሕሩ፣ ሐቆ እለ ለቅሎ በልሶ እቱ ወለ ፍሬ ኩሉ ለዐድ ልትሄዴ፣ ጀነ ዶለ ሽንገላቱ እንዴ ትከሐለ ወትቀደ። ክሕለቱ ወኖሱ ሐቴ ትረፍዑ ከእት ኩሉ ለዐድ ትደውር እቡ፣ ቀደመ ቅንጸቱ ሾመት ወቀጥፈት ከሩ እቱ ከገይስ፣ ዶልከ ቤት ሐቴ nእንዴ ለአቴ በዲር እምሙ ለሓርሰ ወልትሐሰረ እቡ ለዐለየ እማቱ ኩለን በጽሕ፣ ለመጸያከ ምነ ክሕለቱ ትትከሐል። ትድሕሩ ወእለ ረክበት ተሀይቡ፣እሊ ህያብ እሊ አዪ ሓጀት እግል ልግበእ ቀድር። ሶሚት። ሾመት። ሕሳት። ዕጥር ወብዕድ ለሀይባሁ፣ ግሩሽ ለረክብ ወንዋይ ከእግል ለሀቡ ለለሐዜ ልጠናበል ሀለ ልብሎ ከለሀዩቡ፣ ሽንገላት ሰብ ሽንገላት እምብል አወልዋል ምን ሕርስ። ሽንገላት ሰብመ ሀሌት፣ ሕጻን ምን ንእሽ እንዴ ዐበ። ብሉቁ ዶል ተምም ከላስ ግድም አብለቅኮ። ዐቤኮ።ስነት ሰብ በጽሐኮ ህደው እግልዬ ወሕጸው። አውመ ክመ ዐባዪ ሕሰቡኒ በድል ልብል እብ አፍ ምሱል ለአስእል። እለ እስኣለት እለ ሀዬ ሽንገላት ትትበሀል፣ ሽንገላት አክል ሕድ ክም አተምበሊት አውመ ስመያት እት እምር አምዕል ወዕለት ለትገብእ ኢኮን። መንደላይ ርሑ ዶል ለአምን ለወድየ ተ፣፣

መንደላይ አምዕል ለሸንገልኮ ልብላተ። ዮም ሽንገላት ጋንሐቼ ሀሌት አሸንግሉኒ እት ልብል መልህያሙ ወአቅራቡ ልትጋሜ፣ ህቱ ወስነኑ ከላ  ወጅበት እትነ ንሸንግል ዶል ልብሎ እግል ሽንገላት ልትዐንደቆ፣ ለሸንግል ሀለ ነፈር ሰልፍ ብላይ ሔመ እንዴ ትገልበበ ረእሱ ጻብጥ እት እንቱ አስክ ዐድ እሙ ልትወከል፣ ሰሮም አስእኖም እት ዐድ እንዴ ሐድገወ አምበል አስእን ወሰሮም እብ አስእኖም ምስል መልህያሞም ብላዮም እንዴ ትገልበበው ገይሶ፣ ሰልፍ እበ ግልባቤሁ እት ሓሉ መጽእ ከ “ሓሎ አሸንግለኒ። ሸንገልኮ “ ልብሉ፣ ሓሉ ለብላይ እንዴ ነወከ ምኑ ረእሱ ቀንቅን እግሉ ወጸምብሉ፣ ነገለት ብከ። ወአት ብከ አው ለእለ ረክበ ምን ንዋይ ለሀይቡ፣ ሐቆ ለ ህቱ ወመሳኒቱ እት ከሊል ገብኦ፣ እት ኩሎም ዐድ እሙ እንዴ ዶረ ጠናብሎም፣፣ በሌዕ እቶም ወሰቴ፣፣ ለረክበ ለሀይቡ ወለሐግለ ነብረ እንዴ አብለዐ ሳርሖም፣፣ ሐቆ እለ እተ ዐዶም ለአቀብሎ፣ ኩሎም ምስል እተ ድጌ ድውሮ፣ እትሊ ድጌ ለሀለ አብያት እብ ሐት-ሐቴ ለአትዉ፣ እት ክል ቤትከ ነብረ ትትከሬ እግሎም። ሐሊብ። ሔሰስ ወእክል እለ ረክበው በልዖ። ልትሐደሮ ወልትጸምብሎ፣፣እት ዐድ እንዴ መጸው ለዐድ ኢትሐሰረ እቶም ምን ገብእ ሀዬ። ለቤት ኖሶም ለአቱ እተ ከብሬቅ ለአፈግሮ ምነ፣ ቤት እንዴ አተው እተ ለጸንሖም ሔሰስ። መዐር። ዝብድ። ቤጭ ነብረ ክሪት ወእለ ረክበው ነስኦ ምነ፣ ገሌ ብልዕዉ። ገሌ ልትሓሶሱ ወገሌ በዴት ወአኬት ወድው ከገበዮም በትኮ፣ እትለ አምዕል እለ። ለእለ ወደው ምን ወዱ ኩሉ መስሙሕ ቱ፣ ወለ አግርበት ምን ሳብሮመ ነቅሞም አለቡ፣ እሎም መንደሊታት ሸንግሎ ለህለው። ሽንገላቶም ኩሉ ለእግል ልብጽሕዉ ለለሐዙ ዐድ ከም በጽሐው ተምም፣ ዐድ እሞም ወአብሆም እንዴ ሬመ እቶም መትከላስ ምን ለአቤ ወለ አስቦዕ ካምል እግል ልዱሮ ቀድሮ፣ ሑድ ምን ገብእ ሀዬ እት ቅሩብ አምዔላት እንዴ አትመመው የም ሽቅሎም ብዕድ ገብኦ፣ ሽንገላት በዲር ትገብእ ለዐለት። አዜ ዲብ በዴ ትገይስ ለሀሌት ዓደት ተ፣ኩሉ ረአሰ ወስሜተ ለኢለአምሮመ እትሊ ዘመን ሑዳም ኢኮን፣

ኣደም ዐሊ ኣሕመድ