ዓዳትነ ሕሽመትነ

ዓዳትነ  ዕላመትነ።  ሰርጎነ።  ሕሽመትነ  ወአሳስ  ሀለዮትነ ክም ቱ ኩሉ ለልአምረ ሐቂቀት ተ፣ ምናተ ዓዳትነ እሊ ወሎሂ እንዴ እንቤ እግል ንሽርሑ ሰኒ ክቡድ ቱ፣ ላኪን ክል ዶል ፍጭል እንዴ አበልነ። ብሽሬተት ምን ዓዳትነ ወስ እንብል እንገብእ፣ ከአናመ ዮም እብ ሰበት በርጅ (ወረዴ) ሑዳይ እግል ኢበል እኩም ቱ፣ በርጅ  እት  ክል መናሰበት  ፈረሕ  ለልትበረጅ ጅንስ ትልህያ  ቱ፣  እለ  ትልህየ  እለ  ሰብ  ሌጠ  ልተልሀወ፣ እማት ወሐዋት ለዐልለ እሎም ወለዐፍያሆም፣ እምበል እሊመ በርጅ። እት ፍጉር ህዳይ። ዐድ ሕጻን ሌጣ ቶም ለልተልሀዎ፣  ዐድ  ወለት  ወረዴ  ክም  መጽአት  ቶም ለልተልሀዎ፣ ከዲበ ወረዴ ገሌ ምን ፈርያተ እሊ ለተሌ ቱ።-

አላሁ አክበር

ሼጣን ሊጊስ

ወመልኣክ ትሕደር

ሽማገሌ እንቱም ተሐይሶ ረቢ ደሌ

ሽማገሌ አድህር ተ’መት እግል ንትሰሌ፣

ዲብ ሳምሑኒ

ሐውዬ ጸዓዲ

ቃል ሀቡኒ፣

ሐለው ለወ

ዕላል ትዋቅል

‘ግል ልፍተወ፣

ላከፈየ ሰማዲት

ዕላል ቲዴ ወላዲት፣

ሾከን ቡሳይ

መሽዐሊባይ ለኩኑሻይ፣

ወለት ሞዳይ አፍአድር

ወጅሀ ሌለት አልቀድር

ልትዛዮረ ክል ፈጅር፣

ጪረ ትወዴ

ገድከ ምስለ ትበዴ፣

በልቀት ሰሓጢ

ሐማቱ ለታለ ኖሱ ካጢ፣

እሊ ሑዳይ እት ዝክርያቼ ለዐለ ምነ ብዝሕት ዝሕረት ሕላይና ቱ፣

ሕዱግ ስሌማን እድሪስ