ሽዕብ ለከሚሰ....     ኡስታዝ መሐመድ አልሓጅ ሙሰ         ሽዕብ 20 ዩንዮ 2010

ሽዕብ ለከሚሰ። መሻዊ’ተ ነዳይት።

ሞት ክሪት ሚንኣደም ሚዶል ገብአት ጋሻይት።

ማይት ለማይታም ወልደዉ ለወድ ማይት ወድ ማይት።

ኦሮት ከብድ ቀትሎ ወኦሮት ሾከት ራግዳይት።

ወኢትአመረት ቀት’ሉ ነስኡ ምንከ ናስኣይት።

በልሸም ዲበ ጠልመከ አርወሐት ሚበ ባልሳይት።

ፋላቱ ለአተርፍ ሕያይ ልትበሀል ወማይት።

ሞት ሐ’ነ ደባባት ተዐልል እግለ ባክያይት።

እንዴ ሰጥጥ ለዕንታተ ወእንልትቃረጭ ለአምዓይት።

ሕርቅም እንተ ለሕልቅመ ርዕዳይ ገሮብ አንሳይት።

ፍንቲት እንተ ዌልደተ። ውላድ ወስነት ፈታይት።

ለዕላል እግሉ ትትጋደል ዕላል መጠት ጫንታይት።

በአሰ ሞተ አምስሉ ኢኮ ለአባይ ጠባይት።

ኤረትርየ ተአትዋይን ከድረ ለስላም ፎጣይት፣

ሽዕብ ለከሚሰ እንተአትራይም ተአቀርብ።

ሽዕብ ለከሚሰ ለተእሪክ ከአፎ ትፈስሩ።

ሸዐብከ ኢኮን ቤለዩ ከሐን ደባባት ከርክሩ።

ስገ በሸር እብ ሐያት ሐንቴ ጀንዲር ደርድሩ።

ሐራስ ወለዐመሲ ወግርድ ለብካይ በድሩ።

ተብዐት ወአንስ ምን አዳም ስገ ሰግዒት ሸርሽሩ።

ለሐዋን ቅዩር ውዳዩ ለወስፉ ኢትአምሩ።

ከለከሚስ እንትል ሽዕብ ዲብሚ ገብእ ተሐብሩ።

ኢትገብእ ወኢትጠንሕ ክሉ እትሕድ ፈጥሩ።

እንዴ እንካሬ ነፍስነ ለገሮብ ክሉ ፈርፍሩ።

ብዙሕ እንቱ መሻዊት በስ ለሕርየት ጀብሩ፣

ሽዕብ ለከሚሰ እንተአትራይም ተአቀርብ።

ተእሪክ ሳብት ብዲበ ለጀረበ ምን ጀርብ።

ኤረትርየ ለለሐሌ ኢለአትጋርም ወኢጠርብ።

አማን ጭሪት ካርየ በኣዊት ኩፍልት አደርብ።

ለደምነ በሐር እት በሐራቱ ዲመ ኢትደፍፍ ወኢትሸርብ።

ወሽዕብ አምዕል ከሚሰ ምን ክትፈተ ተአገርብ።

ወሽዕብ ወለት እማተ ተእሪክ ተልትል ወተሐርብ።

ወሽዕብ ሽዕበት ሸዐባተ ዶር ኢትበዴ ወኢትከርብ።

ሽዕብ ለከሚሰ እንተአትራይም ተአቀርብ፣

ሽዕብ ለከሚሰ ለሞት እት ሞት ዋጭላቱ።

ወእሊ ሸዐብነ ክሉመ ለከሚስ ሽዕብ ውዕላቱ።

ኦሮት ከእበ አምዕሉ ወለደዐት ኤረትሪ ብህላቱ።

ለምድር ሕነ እንከልኡ ወለ ዐስተር ረቢ ዋቅላቱ፣

ኡስታዝ መሐመድ አልሓጅ ሙሰ

ሽዕብ 20 ዩንዮ 2010